თბილისის სახელმწიფო უნივერსიტეტის ეზოში განათლების რეფორმის წინააღმდეგ “საუნივერსიტეტო დარბაზის” წევრთა ნაწილმა 2005 წლის 27 ივნისს საპროტესტო აქცია მოაწყო. მათ რექტორის რუსუდან ლორთქიფანიძის გადადგომა და მეცნიერ-თანამშრომლების უნივერსიტეტში დაბრუნება მოითხოვეს. აქცია გაგრძელება იყო წინა დღეს უნივერსიტეტში გამართული შეხვედრისა, სადაც “საუნივერსიტეტო დარბაზი” საქართველოს პრეზიდენტის იმ ბრძანებულების წინააღმდეგ გამოვიდა, რომლის საფუძველზეც უნივერსიტეტში გაუქმდა დიდი სამეცნიერო საბჭო და ერთპიროვნული მართვის უფლება რექტორს მიენიჭა. რუსუდან ლორთქიფანიძეს “დარბაზმა” უამრავი კითხვა დაუსვა და მათზე ამომწურავი პასუხი მოითხოვა, თუმცა, შემდეგ პასუხის მოსმენა ოპოზიციურად განწყობილმა ლექტორებმა თავად აღარ მოისურვეს. “დარბაზმა” კატეგორიულად მოითხოვა პრეზიდენტის ბრძანებულების გაუქმება, განათლების რეფორმის დროებით შეჩერება, 800 მეცნიერ-თანამშრომლის უკან, უნივერსიტეტში დაბრუნება და საბაზისო დაფინანსების უკლებლივ შენარჩუნება.

თავად რუსუდან ლორთქიფანიძემ კი განაცხადა: “მიმაჩნია, რომ რეფორმა დროული კი არა, დაგვიანებულიც კი არის. რეფორმა პირდაპირ ითვალისწინებს პროფესორ-მასწავლებლების ატესტაციის პროცესს და შესაბამის რანგში გადაყვანას. გამორიცხული არ არის ისიც, რომ მათ ნაწილს კიდევ მოუწიოს უნივერსიტეტიდან წასვლა, რადგან გაუმართლებელია 21-ათასიან სასწავლებელში 5100 თანამშრომელი ასწავლიდეს. რაც შეეხება იმ 800 მეცნიერს, მათ, უბრალოდ, ვერ მოიპოვეს სამეცნიერო გრანტები. თქვენ იცით, რომ მეცნიერული თემების წარდგენის შემდეგ ვიღებთ შესაბამის გრანტებს და ეს პროცესი ნოემბერში განმეორდება”. 

აქციას, ყველა სასწავლებლის რექტორებისა და განათლების მინისტრის გადადგომის მოთხოვნით, უცხო ენათა უნივერსიტეტის წარმომადგენლებიც შეუერთდნენ. აქციის მონაწილეებმა შექმნეს დაუმორჩილებლობის კომიტეტი, რომელიც ბოლომდე აპირებდა შეურიგებელ ბრძოლას განათლების რეფორმის წინააღმდეგ.