2003 წლის 5 იანვარს ენგურის ხიდთან აფხაზეთიდან დევნილების აქცია გაიმართა. შეკრებილებმა აფხაზეთსა და რუსეთს შორის 2002 წლის 25 დეკემბერს განახლებული სარკინიგზო მიმოსვლის შეწყვეტა მოითხოვეს. 8 იანვარს პარალელური აქცია გაიმართა თბილისში მდებარე რუსეთის საელჩოსთანაც.  მოთხოვნებს დაემატა აფხაზეთში მცხოვრებთათვის რუსეთის მოქალაქეობის მინიჭების შეჩერებაც. ხუთმა დევნილმა საელჩოსთან შიმშილობა გამოაცხადა. 21 იანვარს საპროტესტო აქციის მონაწილეები საქართველოში რუსეთის ელჩმა ვლადიმერ ჩხიკვიშვილმა მიიღო. აქციებზე მოთხოვნებს შორის წინა წლის მსგავსად ისმოდა აფხაზეთიდან რუსეთის მშვიდობისმყოფელების გასვლის მოთხოვნაც. 

19 თებერვალს აქციის ორგანიზატორებს სახელმწიფო მინისტრ ავთანდილ ჯორბენაძესთან ერთად აშშ-ს ელჩი საქართველოში რიჩარდ მაილსი შეხვდა. სახელმწიფო კანცელარიაში გამართული ამ შეხვედრის შემდეგ ორგანიზატორებმა დროებით შეაჩერეს აქცია, რადგან  ამერიკის ელჩი დაჰპირდათ, რომ აფხაზეთის კონფლიქტის მოგვარების პროცესში აქტიურად ჩაერთვებოდა აშშ-ის ადმინისტრაცია.