2010 წლის 30 აპრილს უკანონო და პოლიტიკურ პატიმრებად მიჩნეული ადამიანების გათავისუფლების მოთხოვნით საპროტესტო აქცია პარლამენტთან დაიწყო და მოგვიანებით თავისუფლების მოედნისკენ მსვლელობით გაგრძელდა. არასამთავრობო ორგანიზაციების, საზოგადოებრივი მოძრაობების და ოპოზიციური პარტიების წარმომადგენლებმა თავისუფლების მოედანსა და მის მიმდებარე ქუჩებზე მოაწყვეს ”ცოცხალი ჯაჭვი”, რომელშიც, სააგენტო ინტერპრესნიუსის ცნობით, 3 ათასამდე ადამიანი მონაწილეობდა. მანამდე აქციის მონაწილეთა მოთხოვნები პარლამენტის შენობასთან უკანონო პატიმრებისადმი სოლიდარობის მიზნით შექმნილი მოძრაობის ლიდერმა ეკა ბესელიამ წაიკითხა. მოთხოვნებს შორის იყო პოლიტიკური პატიმრების გათავისუფლება და პოლიტიკურად მოტივირებული საქმეების შეწყვეტა, მასშტაბური ამნისტია და სასჯელთა შეკრების მოქმედი პრინციპის გაუქმება. საპროტესტო აქცია რამდენიმე საათში დასრულდა.

მოძრაობამ “სოლიდარობა უკანონო პატიმრებს” 50-წევრიანი სია 2010 წლის 26 აპრილს გამოაქვეყნა. მოძრაობის ლიდერის ეკა ბესელიას განცხადებით, სიაში ჩამოთვლილ პირებს ოჯახები უკანონო პატიმრებად მიიჩნევდნენ და მათი საქმეები სტრასბურგის სასამართლოში იყო გაგზავნილი. უკანონოდ მიჩნეულ პატიმართა ნუსხაში იყო ”მუხროვანის ამბოხის” გამო გასამართლებული რამდენიმე პირიც.