2010 წლის 22 აპრილს  ზესტაფონის ფეროშენადნობთა ქარხნის მეტალურგების გაფიცვა დაიწყო. მუშები ორი დღით ადრეც გამაფრთხილებლად გაიფიცნენ და ასე გამოუცხადეს სოლიდარობა ქარხნიდან გათავისუფლებულ ორ თანამშრომელს, რომლებიც მეტალურგიული და სამთო მრეწველობის მუშაკთა პროფკავშირის წევრები იყვნენ. გათავისუფლებული კოლეგების სამსახურში დაბრუნებასთან ერთად გაფიცულებმა ხელფასის 50%-ით გაზრდა, შრომის უსაფრთხოების ნორმების დაცვა და შვებულების გახანგრძლივება მოითხოვეს. ქარხნის ადმინისტრაციას 24 საათი მისცეს ამ საკითხებზე მოლაპარაკების დასაწყებად. მას შემდეგ, რაც ფეროს ხელმძღვანელობა მოლაპარაკებას არ დათანხმდა, მეტალურგებმა გაფიცვა განაახლეს. აქციის მონაწილეებთან ზესტაფონის გამგებელი, საკრებულოს თავმჯდომარე და მაჟორიტარი დეპუტატი მივიდნენ. ისინი მუშებს დახმარებას დაჰპირდნენ.

სამი დღის განმავლობაში ქარხანა გაჩერებული იყო. პარალელურად მუშები შიმშილობდნენ კიდეც. მეტალურგების მხარდასაჭერად ზესტაფონში გაერთიანებული პროფკავშირისა და თითქმის ყველა დარგობრივი პროფკავშირის თავმჯდომარე ჩავიდა. აქციის შეწყვეტისა და მოლაპარაკების დაწყების გადაწყვეტილება მხარეებმა ხანგრძლივი დისკუსიის შემდეგ მიიღეს. ქარხნის ადმინისტრაციამ მუშების მოთხოვნების დასაკმაყოფილებლად გარკვეული დრო და გაფიცვის შეჩერება ითხოვა, რაზეც მეტალურგები დათანხმდნენ და გაფიცვა შეწყვიტეს.