აქონდროპლაზიის მქონე ბავშვთა მშობლები პრეპარატ Voxzogo-ს შემოტანას 2022 წლიდან მუდმივად ითხოვდნენ, თუმცა პერმანენტული აქციები 2023 წლიდან დაიწყეს, როცა ჯანდაცვის სამინისტრომ დაპირების მიუხედავად, უარი თქვა პრეპარატის შემოტანაზე იმ მოტივით, რომ „ეფექტურობის შესახებ კვლევები დასრულებული არ არის“.

2023 წლის მარტიდან მშობლებმა წამლის მოთხოვნით პერმანენტული აქციების გამართვა დაიწყეს ჯანდაცვის სამინისტროსთან. 20 აპრილს მათ ჯანდაცვის მინისტრი და მისი მოადგილე შეხვდნენ და განაცხადეს, რომ „თუ აქონდროპლაზიის მედიკამენტს ევროკავშირის ქვეყნები დააფინანსებენ, ამას საქართველოც გააკეთებს“. 

იმის გამო, რომ მშობლებმა ჯანდაცვის მინისტრისგან, ამ პირობის გარდა, სხვა კონკრეტული პასუხი ვერ მიიღეს, აქციების გამართვა დაიწყეს მთავრობის ადმინისტრაციასთან. მშობლები საქართველოს პრემიერ-მინისტრთან შეხვედრას ითხოვდნენ და არ იშლებოდნენ – მთავრობის ადმინისტრაციის შესასვლელთან ღამეებს ათენებდნენ წვიმასა და ქარში. მშობლებს მხარდაჭერას უცხადებდნენ რიგითი ადამიანებიც, ზოგს აქციის მონაწილეებთან ცხელი სასმელი და საკვები მიჰქონდა უჩვეულოდ ცივი გაზაფხულის ღამეების გადასატანად. პარალელურად, პრემიერი ირაკლი ღარიბაშვილი ცდილობდა საზოგადოება დაერწმუნებინა, რომ წამალი ბავშვებისთვის არ იყო სასიცოცხლო მნიშვნელობის. 

ინტენსიური პროტესტის დაწყებიდან 10 დღის შემდეგ, 1 მაისს, ჯანდაცვის მინისტრმა თქვა, რომ „ჩვენ ყოველდღიურად გვაქვს მცდელობა, აღნიშნული იშვიათი დაავადების გარშემო შექმნილი პრობლემები გამოვასწოროთ“. 

5 მაისს უკვე ცნობილი გახდა, რომ ჯანდაცვის სამინისტროში დამტკიცდებოდა პროტოკოლი, რომლითაც უნდა მომხდარიყო პაციენტების მართვა. სწორედ ამ დღეს შეწყვიტეს მშობლებმა 24-საათიანი პროტესტი მთავრობის ადმინისტრაციასთან. 23 მაისს აქონდროპლაზია დაემატა იშვიათი დაავადებების ჩამონათვალს, 14 ნოემბერს კი ცნობილი გახდა, რომ მედიკამენტი საქართველოში იყო. უკვე მომდევნო დღეებში ბავშვებს პირველი ინიექციები გაუკეთეს.