2011 წლის 18 აპრილს სტუდენტები და მათი მხარდამჭერები ივანე ჯავახიშვილის სახელობის თბილისის სახელმწიფო უნივერსიტეტის მეორე კორპუსთან სტუდენტების ძალადობის წინააღმდეგ შეიკრიბნენ . აქციის ორგანიზატორი საინიციატივო ჯგუფი „თარგმნე“ იყო, თუმცა პროტესტს სხვა უნივერსიტეტის სტუდენტთა ნაწილი და მათი მეგობრებიც შეუერთდნენ. ერთ-ერთი ორგანიზატორის, ლაშა ქავთარაძის თქმით, უნივერსიტეტთან აქციის გამართვის მიზეზი 15 აპრილს თსუ-ს მეხუთე კორპუსში განვითარებული მოვლენები გახდა.

ამ დღეს საინიციატივო ჯგუფმა „თარგმნე“ გამართა პრეზენტაცია, რომელზეც სტუდენტებმა უნივერსიტეტში სასწავლო ლიტერატურასთან დაკავშირებულ პრობლემაზე ისაუბრეს: კერძოდ, თსუ-ში სასწავლო ლიტერატურის დიდი ნაწილი ინგლისურენოვანი იყო, ნაწილი კი – უხარისხოდ ნათარგმნი. ამიტომ ისინი ითხოვდნენ,  ხარისხიანი სასწავლო ლიტერატურის თარგმნას. ამ საკითხზე დისკუსიას მოჰყვა პრეტენზიები თსუ-ს თვითმმართველობის მიმართაც. სტუდენტებმა თქვეს, რომ  თვითმმართველობის წევრების “საზღვარგარეთ ვოიაჟებსა და გართობის ნაცვლად”, ჯობია თანხა წიგნების თარგმნაზე იხარჯებოდეს. პრეტენზიებს უნივერსიტეტის თვითმმართველობის წევრების მხრიდან აგრესია მოჰყვა, მათ რამდენიმე სტუდენტი სცემეს.

18 აპრილს გამართულ აქციაზე სტუდენტებმა უნივერსიტეტის თვითმმართველობას უნდობლობა გამოუცხადეს და მოითხოვეს მათი გარიცხვა სასწავლებლიდან, ვინც სხვა სტუდენტების ცემაში მონაწილეობდნენ. მათ, ასევე, მოითხოვეს თსუ-ს თვითმმართველობის სრული ხარჯთაღრიცხვის გამოქვეყნება.

ამ აქციას შედეგი არ მოჰყოლია, თუმცა მომდევნო სტუდენტური მოძრაობა “ლაბორატორია 1918-ის შექმნის საფუძვლად იქცა. სტუდენტები 2011 წელს გამოქვეყნებულ პირველ მანიფესტში წერდნენ: 

„ლაბორატორია 1918“ იქნება სტუდენტთა და პედაგოგთა თვითორგანიზაციის პრინციპზე დაფუძნებული საგანმანათლებლო სივრცის მოდელი უნივერსიტეტში, სადაც პროფესიონალებთან ერთად ვიმუშავებთ თავისუფალი საგანმანათლებლო სივრცის შექმნისათვის და უნივერსიტეტი გახდება სამოქალაქო საზოგადოების ავანგარდი. სწორედ ამგვარ უნივერსიტეტს იმსახურებს საზოგადოება, რომელიც უარს ამბობს თვითმოტყუებასა და ძალისადმი მორჩილებაზე, და ორიენტაციას იღებს განვითარებასა და თავისუფლებაზე”.