2023 წლის 22 ივლისს სოჭიდან საკრუიზო ლაინერმა Astoria Grande-მ დაიწყო ახალი მარშრუტის შესრულება, რომელიც საქართველოს საზღვაო ქალაქში გაჩერებასაც გულისხმობდა. ეს ინფორმაცია ქართული აუდიტორიისთვის ცნობილი 25 ივლისს გახდა.  საქართველოს საზღვაო ტრანსპორტის სააგენტოში თქვეს, რომ გემი „რეგისტრირებულია სეიშელის კუნძულებზე კომპანია Goodwin Shipping Limited-ის სახელით და საერთაშორისო სანქციებში არ ფიქსირდება“, გარდა ამისა, აღნიშნეს, რომ გემი პალაუს დროშის ქვეშ დაცურავდა და მას თურქული საკრუიზო კომპანია Miray Cruises International ემსახურებოდა.

Astoria Grande ბათუმის პორტში 27 ივლისს დილით შევიდა. გემზე 850 მგზავრი იყო, ბათუმში კი ღირსშესანიშნაობების დასათვალიერებლად და ადგილობრივი კერძების გასასინჯად გაჩერდნენ. პორტის ტერიტორია ტურისტებმა ავტობუსებით დატოვეს.

საქართველოს მოქალაქეების ნაწილმა, რომელსაც აგვისტოს ომი ახსოვს, ამ გემის ქვეყნის საზღვრებში შემოსვლა „პუტინის შემოჭრად“ აღიქვა და სწორედ ამიტომ ბათუმის პორტში აქცია გამართა. ათეულობით ადამიანი – აქტივისტები, რიგითი მოქალაქეები და პოლიტიკური პარტიების „ლელოს“ და „ნაციონალური მოძრაობის” წევრები შეძახილებით “Русский корабль, иди на…й” აცილებდნენ  რუს ტურისტებს.

რუსი ტურისტებისთვის დისკომფორტის ასარიდებლად ქართულ პოლიციას პორტში ჯებირი ჰქონდა გავლებული და აქციის მონაწილეებს გემთან მიახლოების შესაძლებლობას არ აძლევდნენ. გემმა პორტი საღამოს დატოვა. 

28 ივლისს სახელისუფლებო პარტიის თავმჯდომარე ირაკლი კობახიძემ „ქაჯობა“ უწოდა პორტში გამართულ აქციას, პრეზიდენტმა სალომე ზურაბიშვილმა კი თქვა, რომ ამაყი იყო ქართველი ხალხით. საქართველოში აშშ-ის ელჩმა, კელი დეგნანმა თქვა, რომ მნიშვნელოვანი იყო რუსი ტურისტების საკრუიზო ლაინერის მიმართ რეაქცია.