2021 წლის ივნისის დასაწყისში ლგბტქ+ ორგანიზაციამ „თბილისი პრაიდმა“ განაცხადა, რომ დედაქალაქში 1-5 ივლისს „პრაიდის კვირეული“ გაიმართებოდა. კვირეული ფილმის ჩვენებით დაიწყებოდა, იქნებოდა „ქვიარ ფესტივიალი“, ბოლო, მე-5 დღეს კი, დედაქალაქში „ღირსების მარშის“ (PRIDE) ჩატარება გადაწყდა. 

საქართველოს პრეზიდენტი სალომე ზურაბიშვილი  ამბობდა, რომ პრაიდის მონაწილეებს უფლება აქვთ, გამოხატონ თავიანითი აზრი, დიპლომატიური მისიების წარმომადგენლები კი ხელისუფლებას მოუწოდებდნნენ, დაეცვათ აქტივისტები. გავრცელდა საქართველოს საპატრიარქოს განცხადებაც, რომელიც მოუწოდებდა საქართველოში აკრედიტებულ საელჩოთა ხელმძღვანელებს, რომ „თავი შეიკავონ თბილისი პრაიდის მხარდაჭერისა და მათი წახალისებისგან“.

კვირეული ფილმის – „ღირსების მარშის“ კლუბ „ხიდში“ დახურული ჩვენებით გაიხსნა. ამას წინ უსწრებდა შინაგან საქმეთა სამინისტროს განცხადება, რომლითაც დებდნენ პირობას, რომ დაგეგმილი ღონისძება უსაფრთხოდ ჩატარდებოდა. 

2 ივლისს, კინოჩვენების დაწყებამდე რამდენიმე საათით ადრე, კლუბ „ხიდის“ მიმდებარე ტერიტორიაზე შეკრება დაიწყეს ჰომოფობიურმა ჯგუფებმა, რომლებიც მისულ სტუმრებს აგინებდნენ, ესროდნენ კვერცხებსა და ქვებს (ფოტოები და ვიდეოები). უნდოდათ, ფიზიკურად გასწორებოდნენ მათ, თუმცა პოლიციამ იქ 23 ადამიანი დააკავა.

„ღირსების მარშის“ გამართვამდე ორი დღით ადრე, საქართველოს საპატრიარქომ კიდევ ერთი განცხადება გაავრცელა და მრევლი 5 ივლისს პარლამენტის მოპირდაპირე მხარეს, ქაშუეთის ეკლესიასთან პარაკლისის აღსავლენად მიიწვია. ხალხს კონტრაქციაზე გამოსვლისკენ მოუწოდებდნენ პრორუსული მედია „ალტ-ინფო“ და მისი ხელმძღვანელები. 

სიძულვილის ჯგუფები რუსთაველის გამზირზე, პარლამენტის შენობის წინ 5 ივლისს, დილიდან იკრიბებოდნენ. იმ დილით მთავრობის სხდომაზე პრემიერ-მინისტრის, ირაკლი ღარიბაშვილის მიმართვით დაიწყო, რომელმაც ირიბად წაახალისა სიძულვილის ჯგუფები. მან თქვა, რომ „ღირსების მარშის“ ჩატარება „მიზანშეუწონელი“ იყო, მის უკან „რადიკალური ოპოზიცია“ იდგა.

დღის საინფორმაციო გამოშვებებში ტელემედია უკვე იუწყებოდა და აჩვენებდა კადრებს, რომ კონტრაქციის მონაწილეები ძალადობდნენ და სიტყვიერ შეურაცხყოფას აყენებდნენ ჟურნალისტებსა და ოპერატორებს, ხელს უშლიდნენ მუშაობაში და უკრძალავდნენ კადრების გადაღებას. 

ქალაქში მომხდარი ძალადობის გამო „თბილისი პრაიდმა“ „ღირსების მარში“ გააუქმა, თუმცა სიძულვილის ჯგუფები არ დაშლილან. იმ დღეს დაშავდა 55 ადამიანი, მათგან 53 ჟურნალისტი. თუმცა სიძულვილის ჯგუფები რუსთაველის გამზირზე არ გაჩერებულან, მათ მოიარეს ქალაქის სხვა ქუჩებიც, სცადეს არასამთავრობო ორგანიზაცია „სირცხვილიას“ ოფისის დარბევა, მესამე სართულზე მდებარე „თბილისი პრაიდის“ ოფისში კი აივნიდან შეიჭრნენ, ჩამოგლიჯეს ლგბტ დროშა და დაარბიეს ოფისი.  ამ დღეს სცემეს TV პირველი ოპერატორი, ლექსო ლაშქარავა, რომელიც რამდენიმე დღეში, 11 ივლისს, დედამ სახლში გარდაცვლილი იპოვა 

მასობრივი ძალადობის შემდეგ სიძულვილის ჯგუფები პარლამენტის შენობის წინ დაბრუნდნენ და იცეკვეს. ამ დღეს მომხდარი ძალადობის გამო 32 ადამიანი დააკავეს, თუმცა მათ შორის არ ყოფილან ორგანიზატორები.