2024 წლის 12 ივლისს „ევოლუშენ საქართველოს“ თანამშრომელთა ნაწილი გაიფიცა სამუშაო პირობების გაუმჯობესების მოთხოვნით. მათ გაფიცვაში პროფკავშირები „ლაბორ“ ეხმარებოდა. პროფკავშირების ცნობით, პროტესტს უერთდებოდა 4621 ადამიანი (კომპანიის ცნობით 700-მდე). სახელდახელო კარვები მოეწყო კომპანიის შენობის შესასვლელთან. 

„ევლოუშენ საქართველო“ 2018 წელს დაფუძნდა. პროტესტის დაწყების დროს მას 7000-მდე თანამშრომელი ჰყავდა, რომელთა საშუალო ასაკი 25 წელი იყო. კომპანია ონლაინკაზინოებს ემსახურება და სთავაზობდა ლაივთამაშის წაყვანის სერვისს „ევოლუშენის“ სტუდიებიდან. 

მათ კომპანიას 44 მოთხოვნა წაუყენეს, მათ შორის ძირითადი ნაწილი შეეხებოდა ხელფასის 100%-ით მატებას და ჰიგიენური პირობების გაუმჯობესებას. ისინი ასევე საუბრობდნენ მენეჯმენტის მხრიდან შეურაცხმყოფელ (დაცინვა) დამოკიდებულებაზე. ონლაინმედიაპლატფორმის „მაუწყებლის“ გავრცელებული მიმოწერის მიხედვით მენეჯერები დილერებს დასცინოდნენ ფრჩხილის სიგრძის, ჩაცმულობის, წონის თუ კანის ფერის გამო.

თანამშრომელთა გაფიცვის 24-ე დღეს, 5 აგვისტოს „ევოლუშენ ჯორჯიამ“ საქართველოში მუშაობა დროებით შეაჩერა. გაფიცულები ფიქრობდნენ, რომ ეს მათი პირველი გამარჯვება იყო, კომპანია კი სხვა თანამშრომლების ხელმოწერების შეგროვება დაიწყო გაფიცულთა წინააღმდეგ.

„თუ მოცემული მდგომარეობა არ შეიცვლება, კომპანია იძულებული იქნება, განახორციელოს საოპერაციო ცვლილებები, მათ შორის შრომითი ხელშეკრულებების შეწყვეტები, რათა შევზღუდოთ ჩვენი წარმომადგენლობა საქართველოში“, – ეწერა კომპანიის განცხადებაში.

უკვე 8 აგვისტოს გაფიცულმა თანამშრომლებმა შიმშილობა დაანონსეს, 9 აგვისტოს კი კომპანიამ დასაქმებულების 1000-ით შემცირების აუცილებლობაზე ისაუბრა.

გაფიცვის 33-ე დღეს, 13 აგვისტოს კომპანიის ოთხმა გაფიცულმა თანამშრომელმა შიმშილობა დაიწყო. მათგან ერთ-ერთმა მოგვიანებით პირი ამოიკერა. 21 აგვისტოს კომპანიამ თანამშრომელბს განცხადებით მოუწოდა „ნუ შეუქმნიან საკუთარ თავს და ჯანმრთელობას საფრთხეს, გაუფრთხილდნენ საკუთარ თავს, რადგან ამ გზით „ევოლუშენის“ პოზიცია, რომელიც ცხადი იყო ყველა მხარისთვის, არ შეიცვლება“, 22 აგვისტოს გაფიცულებს სახალხო დამცველი შეხვდა.

26 აგვისტოს იმ გაფიცულებმა, რომლებიც ბოლო ორი კვირის განმავლობაში შიმშილობდნენ, განაცხადეს, რომ მზად იყვნენ პროტესტის ეს ფორმა შეეწყვიტათ, თუ გაფიცულები ხელფასს მიიღებდნენ.

2025 წლის 2 მარტის მონაცემებით, გაფიცვა გრძელდება.