21-დღიანი უშედეგო მედიაციის შემდეგ, 2021 წლის 18 მაისს მინერალური წყლის მწარმოებელი კომპანია „ბორჯომის“ (IDS ბორჯომი საქართველოს) თანამშრომლები ხელფასების მატებისა და სამუშაო პირობების გაუმჯობესების (შესვენების და დასვენების უფლება, ზოგი მათგანი 7 დღეს მუშაობდა) მოთხოვნით გაიფიცნენ. ამ მიზეზით სრულად გაჩერდა ორივე ქარხან. გაფიცული იყო 400-მდე თანამშრომელი. თანაშრომლებმა კარვები გაშალეს კომპანიის შესასვლელთან.

დასაქმებულები ამბობდნენ, რომ  მათი ხელფასები 400-500 ლარის ფარგლებში მერყეობდა. 20 მაისს კომპანიის გაფიცულმა თანამშრომლებმა ბორჯომში მსვლელობა მოაწყეს.

26 მაისს ცნობილი გახდა, რომ 400-მდე თანამშრომლის მოთხოვნა ხელფასების ზრდაზე, სამუშაო პირობების გაუმჯობესების და ზეგანაკვეთური შრომის ანაზღაურებაზე დაკმაყოფილდა – მათ შორის შეთანხმება გაფორმდა. 27 მაისიდან თანამშრომლები სამუშაო ადგილს დაუბრუნდნენ.