2004 წლის 23 ივლისს ბათუმის ცენტრალური ბაზრის 3000-მდე მოვაჭრემ აჭარის უმაღლესი საბჭოს შენობის წინ აქცია გამართა. ისინი ახალ შენობაში გადასვლას აპროტესტებდნენ და აჭარის ავტონომიური რესპუბლიკის მთავრობის თავმჯდომარე ლევან ვარშალომიძესთან შეხვედრას მოითხოვდნენ. ვარშალომიძე სულ სამი დღის არჩეული იყო ამ თანამდებობაზე, რომელიც ასლან აბაშიძის გადადგომის შემდეგ დაიკავა. გაზეთ “კვირის პალიტრის” ინფორმაციით, “ვარშალომიძის ნაცვლად მათ კობა ხაბაზი შეხვდა. მოვაჭრეებს სანუგეშო მანაც ვერაფერი უთხრა და ბათუმის ქუჩებში ისევ გაგრძელდა მომიტინგეთა აქციები… ვარშალომიძის თქმით, მომხდართან დაკავშირებით მიმდინარეობს მოკვლევა, რომლითაც გამოავლენენ აქციის ორგანიზატორებს და, შესაბამისად, პასუხს აგებინებენ”.

მოვაჭრეები 1 სექტემბერსაც შეიკრიბნენ ბათუმის ბაზრის გარეუბანში გადატანის გასაპროტესტებლად. ბაზრის შენობაში დილით აჭარის სპეცდანიშნულების რაზმი შევიდა და მოვაჭრეებს ტერიტორიის დატოვება მოსთხოვა. თუმცა, მოვაჭრეები ვერ გამოიყვანეს. აჭარის შინაგან საქმეთა მინისტრის დავით ღლონტის განცხადებით, მოვაჭრეებთან შეტაკების შედეგად 9 პოლიციელი დაიჭრა. მოვაჭრეები იმ ღამეს ბაზარში დარჩნენ, 2 სექტემბრის გამთენიისას 500-მდე სპეცრაზმელი კვლავ შევიდა ბაზრის შენობაში და იქ მყოფები გამოყარა, რა დროსაც 13 ადამიანი დაშავდა.