2004 წლის ნოემბერში სახელმწიფო კანცელარიასთან რამდენიმე დღის განმავლობაში საპროტესტო აქციას მართავდნენ კახეთიდან ჩამოსული გლეხები. ისინი საქართველოს სოფლის მეურნეობის მინისტრს, დავით შერვაშიძეს პირობის შეუსრულებლობას სდებენ ბრალად. მათი განცხადებით, დავით შერვაშიძე თვენახევრის წინ ჩაბარებული ყურძნის საფასურის გადახდას დაჰპირდა გლეხებს, მაგრამ დაპირება დაპირებად დარჩა.

“მინისტრი დაგვპირდა, რომ თანხას 20 დღეში მივიღებდით, მაგრამ ჩანს, მოგვატყუა, ამიტომ დახმარებას საქართველოს მთავრობასა და პრეზიდენტს ვთხოვთ”, _ აცხადებდნენ კანცელარიის წინ თავმოყრილი გლეხები. მინისტრმა კახელი გლეხების საპასუხოდ განაცხადა: “ყურძნის საფასური შესაბამისმა ბანკმა უნდა გასცეს. ამ შემთხვევაში სამინისტრო არაფერ შუაშია, ჩვენ მხოლოდ შუამავლის როლი შევასრულეთ”.