2011 წლის ოქტომბერში თბილისის მერმა გიგი უგულავამ განაცხადა, რომ მერია ახალ პროექტს იწყებდა, რომლის ფარგლებშიც პრესის ძველ ჯიხურებს აიღებდნენ და მათ ნაცვლად თანამედროვე დიზაინის ჯიხურები დაიდგმებოდა. ამან პრესის ჯიხურების მფლობელთა უკმაყოფილება გამოიწვია, რადგან ფასის სიძვირის გამო ისინი აუქციონში მონაწილეობას ვერ მიიღებდნენ. შედეგად აუქციონში სხვა პროდუქციის გამავრცელებელმა კომპანიებმა გაიმარჯვეს. პრესის ჯიხურები კი აიღეს. საზოგადოებრივმა ორგანიზაციებმა და მედიამ ეს პრესაზე ზეწოლად მიიჩნია. მერიის წარმომადგენლები საპასუხოდ ამბობდნენ, რომ ახალ ჯიხურებში ჟურნალ-გაზეთების გაყიდვაც იქნებოდა შესაძლებელი.

ეს ინიციატივა 29 ნოემბერს ჯერ თბილისის მერიასთან გააპროტესტეს, აქციის მონაწილეებს ხელში გაზეთები ეჭირათ, გულზე კი მიკრული ჰქონდათ ფურცლები, წარწერით „No Press, No Democracy“. 20 დეკემბერს კი პრეზიდენტის რეზიდენციასთან  მივიდნენ იმავე წარწერებით. მერიის ინიციატივა კიდევ ერთხელ 30 დეკემბერს გააპროტესტეს, ამჯერად სასტუმრო “ჰოლიდეი ინის” წინ. სადაც  ჟურნალისტები, ადვოკატები, რამდენიმე არასაპარლამენტო ოპოზიციის წარმომადგენლები და მედიაექსპერტები შეიკრიბნენ. მათ თან ჰქონდათ ფარნები, რითიც შეეცადნენ სიმბოლურად მოეძებნათ პრესის რეალიზაციის ის ჯიხურები, რომლებიც თბილისის მერიის პროექტის ”1000 ჯიხურის” ფარგლებში აიღეს. სწორედ ასე, ფანრებით, ლამპრებით და პლაკატებით ხელში, გადაკვეთეს აქციის მონაწილეებმა გამსახურდიას გამზირი და დოლიძის ქუჩის კუთხეში სიმბოლურად იმ ადგილას შეჩერდნენ, სადაც ცოტა ხნით ადრე პრესის რეალიზაციის ჯიხური იდგა. აქციის მონაწილეთა ნაწილს ხელში ეჭირა წარწერები: “ჩვენ ვაშუქებთ, სააკაშვილი აბნელებს”. 

აქციის მიმდინარეობისას გამოჩნდნენ ადამიანები, რომელთაც სპეციალური უნიფორმა ეცვათ, წარწერით: ”მე მიყვარს თავისუფალი პრესა”. ისინი სხვადასხვა ჟურნალ-გაზეთებით დატვირთულ ურიკებს დაატარებდნენ.

პროტესტის მიუხედავად, მერიას გადაწყვეტილება არ შეუცვლია.