„ქალზე ძალადობა დანაშაულია“ – სწორედ ამ ლოზუნგმა გააერთიანა ხალხი 2014 წლის 25 ნოემბერს, ქალთა მიმართ ძალადობის წინააღმდეგ ბრძოლის დღეს. თბილისსა და საქართველოს კიდევ 22 ქალაქში გაიმართა აქციები. 2014 წელს 24 ქალი მოკლეს. გახშირებული იყო ოჯახში ძალადობის ფაქტები. თბილისში, საქართველოს პარლამენტის შენობის წინ, “ქალთა მოძრაობის” ინიციატივით, ძალადობის გასაპროტესტებლად ასეულობით ადამიანი შეიკრიბა.  აქციას პოლიტიკოსებიც შეუერთდნენ. მონაწილეებმა ხელი მოაწერეს პეტიციას, სადაც გაწერილი იყო ნაბიჯები, რაც ხელისუფლებას ქალთა მიმართ ძალადობის შესაჩერებლად უნდა გადაედგა. აქციის მონაწილეებმა სპეციალურად გაშლილ ბანერზე საღებავებით საკუთარი ხელის ანაბეჭდი დატოვეს.