2019 წლის კანის კინოფესტივალზე ქართულ-შვედური ფილმი – And Then We Danced საუკეთესო ფილმებში მეშვიდე ადგილზე გავიდა. მთავარი როლის შემსრულებელი მსახიობი ლევან გელბახიანი, ანა ჯავახიშვილი, გიორგი წერეთელი, თამარ ბუხნიკაშვილი და მარიკა გოგიჩაიშვილი არიან.  საქართველოს კინოთეატრებში გეი დრამის ჩვენებისთვის მოლაპარაკებები მიმდინარეობდა. 

კინოჩვენება საქართველოს კინოთეატრებში 8-10 ნოემბერს გაიმართა. 8 ნოემბერს, კინოჩვენების გამართვამდე შინაგან საქმეთა სამინისტროს პრესსამსახურში ჟურნალისტებს უთხრეს, რომ დაიწყეს შესწავლა, შეიცავდა თუ არა ფილმი პორნოგრაფიის ნიშნებს. 

ჰომოფობიური ჯგუფები კინოჩვენების ჩაშლას გეგმავდნენ. საპატრიარქომ 6 ნოემბერს განცხადება გაავრცელა, რომლის მიხედვითაც, „ეს, პირველ რიგში, გაკეთდა იმისთვის, რომ შეცვალონ ჩვენი ხალხის ცნობიერება, დააცხრონ ლგბტ ურთიერთობისადმი საზოგადოებაში არსებული უარყოფითი მუხტი და საბოლოო ჯამში მიაღწიონ ამ ცოდვის ლეგალიზებას“. რამდენიმე დღით ადრე, 31 ოქტომბერს ჰომოფობიური გაერთიანების „ქართული მარშის“ ლიდერმა სანდრო ბერეგაძემ თქვა, რომ არ დაუშვებდა ამ ფილმის კინოთეატრებში ჩვენებას.

8 ნომბერს თბილისსა და ბათუმში კინოთეატრებთან პოლიცია კინოჩვენების დაწყებამდე რამდენიმე საათით ადრე გამოჩნდა. სიძულვილის ჯგუფების განსაკუთრებული მობილიზება იყო თბილისში, კინოთეატრ „ამირანთან“. იქ რადიკალურად განწყობილი ადამიანები ისროდნენ მაშხალებს, იგინებოდნენ და ისმოდა შეძახილები: „სირცხვილი, სირცხვილი“ და „საქართველო, საქართველო“. ისინი პოლიციისგან მოითხოვდნენ კორდონი გაეხსნათ და შენობაში შესვლის შესაძლებლობა მიეცათ. 

კინოთეატრ „აპოლოში“ შესვლას ცდილობდნენ სიძულვილის ჯგუფის წევრები ბათუმშიც. კინოთეატრთან ასეულობით პოლიციელი იყო მობილიზებული.

წინააღმდეგობის მიუხედავად, კინოჩვენება დათქმულ დროს, 19:30 საათზე დაიწყო. კინოთეატრთან დაშავდა, რადგან გაურკვეველი ნივთი ესროლეს, სამოქალაქო აქტივისტ ანა სუბელიანს, რომელიც ერთ-ერთი მაყურებელი იყო. პოლიციამ აქციაზე 11 ადამიანი დააკავა.