2019 წლის კანის კინოფესტივალზე ქართულ-შვედური ფილმი – And Then We Danced (და ჩვენ ვიცეკვეთ) საუკეთესო ფილმებში მეშვიდე ადგილზე გავიდა. მთავარი როლის შემსრულებელი მსახიობი ლევან გელბახიანი, ანა ჯავახიშვილი, გიორგი წერეთელი, თამარ ბუხნიკაშვილი და მარიკა გოგიჩაიშვილი არიან.  საქართველოს კინოთეატრებში გეი დრამის ჩვენებისთვის მოლაპარაკებები მიმდინარეობდა. 

კინოჩვენება საქართველოს კინოთეატრებში 8-10 ნოემბერს გაიმართა. 8 ნოემბერს, კინოჩვენების გამართვამდე შინაგან საქმეთა სამინისტროს პრესსამსახურში ჟურნალისტებს უთხრეს, რომ დაიწყეს შესწავლა, შეიცავდა თუ არა ფილმი პორნოგრაფიის ნიშნებს. 

ჰომოფობიური ჯგუფები კინოჩვენების ჩაშლას გეგმავდნენ. საპატრიარქომ 6 ნოემბერს განცხადება გაავრცელა, რომლის მიხედვითაც, „ეს, პირველ რიგში, გაკეთდა იმისთვის, რომ შეცვალონ ჩვენი ხალხის ცნობიერება, დააცხრონ ლგბტ ურთიერთობისადმი საზოგადოებაში არსებული უარყოფითი მუხტი და საბოლოო ჯამში მიაღწიონ ამ ცოდვის ლეგალიზებას“. რამდენიმე დღით ადრე, 31 ოქტომბერს ჰომოფობიური გაერთიანების „ქართული მარშის“ ლიდერმა სანდრო ბრეგაძემ თქვა, რომ არ დაუშვებდა ამ ფილმის კინოთეატრებში ჩვენებას.

8 ნოემბერს თბილისსა და ბათუმში კინოთეატრებთან პოლიცია კინოჩვენების დაწყებამდე რამდენიმე საათით ადრე გამოჩნდა. სიძულვილის ჯგუფების განსაკუთრებული მობილიზება იყო თბილისში, კინოთეატრ „ამირანთან“. იქ რადიკალურად განწყობილი ადამიანები ისროდნენ მაშხალებს, იგინებოდნენ და ისმოდა შეძახილები: „სირცხვილი, სირცხვილი“ და „საქართველო, საქართველო“. ისინი პოლიციისგან მოითხოვდნენ კორდონი გაეხსნათ და შენობაში შესვლის შესაძლებლობა მიეცათ. 

ბათუმში კინოთეატრ „აპოლოშიც“ ცდილობდნენ შესვლას ჰომოფობიური ჯგუფის წევრები. დემონსტრანტებმა კვერცხები და შუშხუნები შეყარეს კინოთეატრში. იქაც ასეულობით პოლიციელი იყო მობილიზებული.

წინააღმდეგობის მიუხედავად, კინოჩვენება დათქმულ დროს, 19:30 საათზე დაიწყო. პოლიციისა და სპეცრაზმის მობილიზების მიუხედავად, აგრესიული პირების თავდასხმის გამო, თბილისში აქციაზე დაშავდნენ ანა სუბელიანი, დავით ბერძენიშვილი და ერთი პოლიციელი.

შსს-ს ცნობით, სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობისა და ხულიგნობის ბრალდებით 24 ადამიანი დააკავეს თბილისში, ხოლო 3 – ბათუმში. ფილმის ჩვენებისას აქციების დროს მომხდარ ინციდენტებთან დაკავშირებით იძიებდნენ ოთხ ფაქტს: შსს-ს კუთვნილი ავტომობილის დაზიანება, დავით ბერძენიშვილზე თავდასხმა, ანა სუბელიანის ჯანმრთელობის დაზიანება, პოლიციელებზე თავდასხმა და ორი პოლიციელის დაშავება. ანა სუბელიანის ჯანმრთელობის დაზიანების გამო დაკავებული იყო შალვა შევარდნაძე. მას 2020 წლის პირველ ივლისს 1 წლით და 6 თვით თავისუფლების აღკვეთა მიესაჯა.